Við Tórði á túri

Við Tórði á jólatúri
18-12-2023
Tráan eftir farnari tíð, siðvenjur og hugni eru nøkur ting, vit seta í samband við jólatíðina. Í dag vitja vit kring landið og hesin túrur er merktur av jólafyrireiking

Aftur í ár selur Kiwanis í Havn jólatrø aftanfyri Sjónleikarhúsið. Teir vænta at selja eini 800 trø í ár, og ágóðin fer til Jólahjálpina hjá Barnabata, sigur Petur Jakobsen frá Kiwanis. Tey flestu keypa jólatræ frá Kiwanis fyri at stuðla, sigur hann. Arnleyg Sørensen hevði lætt við at finna eitt jólatræ. Hon sigur, at familjan fer til Vestmannar at halda jól, men kortini vilja tey hava eitt jólatræ í heiminum.

 

Ruth Laksáfoss í Klaksvík er serliga jólalig. Hon og maðurin Gert hava aftur í ár gjørt eina hugnaliga jólabygd í djúpa vindeygakarminum í køkinum. Bygdin verður størri og fjølbroyttari á hvørjum ári, tí Gert ger á hvørjum ári nýggjar lutir. Bygdin sær ógviliga livandi út og nógv fólk støkka inn á gólvið fyri at síggja jólabygdina. "Vit elska bæði jól og leggja stóran dent á at njóta løturnar", sigur Ruth.

 

Strandingurin Ásbjørn Berthelsen hevur nógv jørn í eldinum. Hann hevur fingið sær farloyvi sum lærari í eitt ár og brúkar nú tíðina at undirhalda, umframt at hann er leiðari hjá fýra kórum. Serliga nú jólini standa fyri durum er nógv á skránni og hann undirheldur í jólatiltøkum. "Tá eg undirhaldi leggi eg stóran dent á at fáa nakað aftur frá bæði børnum og vaksnum, sum eru áhoyrarar", sigur Ásbjørn, sum m.a. gyklar.

 

Mariia Shvets Olsen í Rituvík er úr Ukraina, og hon greiðir frá, at í heimlandinum hevur verið vanligt at jól eru eftir tí juliansku tíðarrokningini, tí trúarlæran í Ukraina er ortodoks. Tá er jóladagur 7. januar. Men fyri at bróta við russiskan sið hava myndugleikarnir í Ukraina gjørt av, at nú verða almennu jólini 25. desember - eftir gregoriansku tíðarrokningini sum í vesturheiminum. Mariia sigur, at á jólum koma familjurnar nógv saman og fáa góðan mat.

 

91 ára gamla Daniella Leo úr Fámjin, sum er ættað úr Sumba, býr nú á Ellisheiminum á Tvøroyri. Hon hevur í mong ár bundið eitt ótal av teppum at senda til treingjandi fólk úti í heimi.  Hon hevur í sjónvarpi mangan sæð hvussu stórur tørvur er á hjálp úti í heimi. Í sendingini greiðir Daniella eisini frá hvussu smáligt tað var tá hon vaks upp í Sumba. Børnini funnu sær leikur á ruskdunganum. Og Daniella vaks upp við moldgólvi.

 

Christian Gabrielsen, diakonur, hevur virkað í Mariukirkju í Havn í meira enn 40 ár. Jólanátt í ár verður seinasta midnáttarmessan saman við fransiskanarsystrunum, ið nú rigga av eftir at hava virkað í 90 ár í Føroyum. "Tíverri dettur tað persónliga sambandið, sum systrarnar hava havt við fleiri ættarlið, burtur. Tað er ein stórur missur", sigur Christian Gabrielsen, sum leggur dent á, at messan jólanátt kortini heldur fram sum nú.

 

Hansina Magnussen á Toftum dámar sera væl at lurta eftir gamla siðinum í Útvarpinum, at føroyingar í útlondum senda jólaheilsan heim til familju og vinir. Hansina sigur, at hon kann enntá finna uppá at lurta eftir jólaheilsum á hásumri. "Tað er so hugnaligt og kensluborið við jólaheilsum. Tað ger nakað serligt inni í mær og gomul barnaminnir koma fram", sigur hon. Fyri Hansinu er guðstænastan jólaaftanskvøld nakað heilt serligt.

 

Við Tórði á túri

Í sendingini "Við Tórði á túri", sum verður send í Útvarpinum mánadag klokkan 17:05, vitjar Tórður Mikkelsen við mikrofonini bygdir og býir kring landið og varpar ljós á gerandisdagin hjá fólki. Forvitnið er drívmegin og evni, ið ikki skapa yvirskriftir í miðlunum, hava mangan stóran týdning fyri fólkið á staðnum. Tað eru nógvar smærri bygdir kring landið, sum sjáldan fáa pláss í miðlunum, men sum avgjørt hava sína søgu. Og hvørt menniskja hevur eina søgu at fortelja. Tað hoyra vit í reportasjunum í Útvarpinum mánadag klokkan 17:05. Fyri at skapa eina variatión í sendingunum, vitjar Tórður Mikkelsen viðhvørt býlingar og ávísar gøtur. Hann hevur eisini lýst serlig tiltøk, m.o. Bindifestivalin og Sjómannadagin, og onkuntíð er hann á túri í øðrum londum.
Astrid Joensen, sum fyllir 101 ár í dag, hevur altíð búð á Eiði
27-05-2024
Ein gonguruta úr Skálavík niðan í Skálhøvda er nú stungin út. Hetta er ein lættur túrur og uppi í Skálhøvda er sera gott útsýni. Røktingarmaðurin Tróndur av Trøð greiðir frá
13-05-2024
Tær eru tríggjar systrar úr Húsavík, sum eru føddar sama dag ymisk ár, summarmáladag. Og húsfrúgvin, sum var óvanliga rík og livdi um ár 1400, hevur eisini gjørt bygdina kenda
06-05-2024
Húsavík er millum elstu bygdir í landinum. Her eru nógvar søgur og sagnir og her eru fleiri gomul hús varðveitt enn nógva aðra staðni í landinum
29-04-2024
Í dag er túrurin í býlinginum á Sevmýri, har nógvar søguligar uppgerðir hava verið í fótbólti, men her henda stórar broytingar júst nú. Og vit hitta fleiri fólk, ið búgva her
15-04-2024
Høvuðspersónurin á túrinum í dag er 91 ára gamli gjáarmaðurin Petur Jacob Sigvardsen, sum hevur givið fleiri og 20 bøkur út eftir at hann bleiv pensiónistur
25-03-2024
Tey hava sungið nærum kring alt landið, og tað er hugtakandi at hoyra og síggja kórið Sangfuglar við minnisveikum fólkum framføra kórsang. Kórið hevur verið til í seks ár
18-03-2024
Í ár varð serliga nógv gjørt burtur úr í sambandi við kvinnudagin 8. mars. Tiltøk vóru alla vikuna og vit hoyra um nøkur á hesum túrinum.
11-03-2024
Fyrstu sethúsini í býlinginum á Breiðabliki í Havn vórðu reist fyri góðum 20 árum síðani. Og í dag vita tey, sum har búgva, at siga frá nógvum søgum
04-03-2024
Fyri 18. ferð hava torradagar verið í Klaksvík. Eitt tiltak, sum samlar nógv fólk í sambandi við fiskivinnu og mentan. Á hesum túri vitja vit fleiri av tiltøkunum
26-02-2024
Gamla Hospital í Havn, sum varð tikið í brúk í 1829, kemur nú til heiður og æru aftur. Í 43 ár hava Vanja Petersen og onnur arbeitt við at fáa tað til eitt savn ov fortíðina
19-02-2024
Næstseinasta vikuskifti var ein hópur av tannáringum á Mini Teen Street á Kambsdali. Í sendingini hitta vit fleiri, sum eisini plaga at vera á altjóða leguni í Týsklandi
12-02-2024