Tað hevur altíð verið nógv samband millum Klaksvík og Leirvík: Leirvíkingar mynstraðu við skipum úr Klaksvík, og útróðrarbátarnir úr Leirvík bæði avreiddu og tóku ís í Klaksvík.
Og tá ið leirvíkingar og fólk úr norðrara parti av Eysturoynnið skuldu til Havnar, var tað ofta við ferðamannaskipunum ella postbátunum, sum sigldu á Klaksvík, samstundis sum læknabáturin Medicus eisini gjørdi nógvar túrar til Leirvíkar og aðrar bygdir í Norðureysturoynnið eftir sjúklingum, sum skuldu á Klaksvíkar Sjúkrahús.
Ferðasambandið millum Klaksvík og Leirvík hevur eisini havt stóra ávirkan á Leirvík - eitt nú hevur ferjusambandið um Leirvíksfjørð ivaleyst skundað undir Leirvíkstunnilin, ið varð tikin í nýtslu í 1985.
Og hvør minnist ikki kioskina skamt frá gomlu ferjuleguni í Leirvík og grillmatin í Laðangarði og seinri á Statoilstøðini?
Í 1970 yvirtekur Strandfaraskip Landsins farleiðina Klaksvík, Kunoyar bygd og Kalsoynna og farleiðina um Leirvíksfjørð frá Hugo Gardar, samstundis sum strandferðslan eisini yvirtekur Barsskor og Gardar, ið er gamli Vesturleið, sum nú fær navnið Kjógvin.
Ein av fyrstu uppgávunum hjá Strandfaraskipum Landsins er at dagføra farleiðina um Leirvíksfjørð.
Og valdagin 7. november 1970 kemur bilferjan Ternan, sum er keypt úr Týsklandi - har hon varð bygd í 1960 og tá nevndist Wiking, á Klaksvík á fyrsta sinni. Ternan tekur einar 15 bilar og umleið 100 ferðafólk.
Í sendingini hitta vit Jógvan Ravnsfjall, Sjúrð Eliasen, Poul Magnus Joensen og Byrger Heinesen.
Tú kanst hoyra sendingina her!