Stórar broytingar og útbyggingar fara fram í Føroyum í sjeytiárunum. Eitt nú verða Eysturoyggin og Streymoyggin samanbundnar í 1973 og árið eftir fáa Borðoyggin og Viðoyggin fast samband.
Bilarnir gerast eisini fleiri og fleiri, og tað sama er galdandi, tá ið talan er um bilferjur, ferjulegur, tunnlar eins og fleiri bygdir eisini fáa vegasamband.
Hetta er eisini tíggjuáraskeiðið, tá ið Norðskálatunnilin verður tikin í nýtslu, og risastóra bilferjan Smyril kemur til landið, samstundis sum farið verður undir millumlandasiglinga við Smyrli.
Fólkatalið í Føroyum veksur eisini í sjeytiárunum - við sløkum 12 prosentum ella 4.634 fólkum - úr 38.653 í 1970 til 43.287 fólk í 1980.
Í hesari sendingini útgreinar Hans Andrias Sølvará, dekanur og professari í søgu, føroyska samfelagið í 1970-árunum, Dánjal Poulsen og Heini F. Petersen minnast oljukreppuna, sum eisini rakti Føroyar á vetri 1973/74, og Birgir Enni sigur okkum um, tá ið gamli Tróndur varð sprongdur í luftina fyri kongavitjanina á sumri 1971.
Tú kanst hoyra sendingina her!