Lagt var fyri við duettini 'Einarsson' hjá Michella Evely og Róa. Húsorkestrið var ein trio við Lív Næs, Tróndur Enni, og Óla Holbæk. Tvøroyrar Hornorkestur spældi eitt enskt stykki; 'Barnard Castle' eftir Goff Richards, og 'Gundurs Studioorkestur í Trongisvági' hevði latið sendingini upptøku av kærleikssangi, 'Tú ert so vøkur'.

Mariann Johansen og Birita Johansen leiktu brot úr Karius og Baktus uppseting, sum tær fara at framføra alment í mai mána. Og send varð ein reportasja, sum Gundur Johansen hevði gjørt. Hann var farin um oynna at kanna hugburðin í ymsu bygdunum fyri ætlaða Suðuroyartunnlinum. Sera stuttligt.

Prátini vóru fýra. Esmar Berg í Nesi, Hvalba, greiddi frá Hvalba og Sandvík í søgu og nútíð, umframt sumt frá tíð síni sum lærari í umleið fýrati ár. Vivie Davidsen, skúlastjóri á Heilsuskúlanum í Hovi, segði frá innihaldi, møguleikum og ætlanum fyri skúlan. Umframt at spæla sjónleik greiddu Mariann og Birita frá sjónleikslívinum, og at enda vóru tað fýra umboð fyri Tvøroyar Bóltfelag, sum komu á gátt at siga frá hugburði og støðuni í felagnum. Teir vóru Gilli Rólantsson Sørensn, landsliðsleikari, Poul Ingason, liðformaður í bestu fótbóltsdeildini hjá monnum, og Andre Dalfoss, sum er formaður í TB. Vánirnar eru góðar og spenningurin stórur til kappingarárið.

Café Salt 19 apríl 2023