Rumenia: Ein vaknaður hondbóltsrisi

08.03.2023 - 12:46
ÍtrótturHondbóltur
Rumenia: Ein vaknaður hondbóltsrisi
Í kvøld skal føroyska manslandsliðið í hondbólti spæla EM-undankappingardyst móti Rumenia, sum av álvara hevur kós aftur móti toppinum í altjóða manshondbólti.
Demis Grigoras er ein av fleiri stjørnuspælarum á rumenska landsliðnum. Og hann verður eisini við í kvøld, tá EM-undankappingardysturin millum Føroyar og Rumenia verður.
 

Eftir drúgva oyðimarkargongd er gamli hondbóltsrisin vaknaður úr dvala. Tað var tann tíð, at Rumenia var fremst í manshondbólti.

 

Ein sonn hondbóltstjóð

Rumenia vóru heimsmeistarar fýra ferðir frá 1961 til 1974. Tá vóru HM-kappingar triðja hvørt ár.

Í 1967 vunnu teir bronsu í Svøríki. Ta ferðina vann Kekkoslovakia finaluna móti Danmark. Annars var Rumenia heimsmeistari alt hetta tíðarbilið - í 1961, 1964, 1970 og 1974.

Eftir tað var nógv tosað um úrmælingin Vasile Stinga - kongurin í rumenskum og altjóða hondbólti í fleiri ár.

Rumenia vann bronsu í manshondbólti á olympisku summarleikunum í Moskva 1980 og Los Angeles 1984. Seinasta góða rumenska úrslitið í einum endaspæli finna vit í 1990, tá enn eitt bronsumerki var vunnið í HM-endaspælinum í Kekkoslovakia. Tá hendir eitt skifti.

Svøríki við Bengt Johansson við róðrið taka stýripinnin og gerast hin nýggi hondbóltsrisin í altjóða manshondbólti øll 90-árini. Londini eystanfyri - gomlu hondbóltsstórveldini Sovjet, Rumenia, Kekkoslovakia og Jugoslavia - ganga so líðandi til grundar í dusttáminum, tá Múrurin fall.

 

Styrkt Champions League-lið

Nú røkist so smátt fyri einari endurreisn av Rumenia sum falnari hondbóltstjóð. 

Stórfelagið Dinamo Bukarest, sum er bulurin á rumenska landsliðnum, er farið at gera um seg í tungvektsflokkinum í evropeiskum manshondbólti - Champions League.

Rumenska høvuðsstaðarfelagið hevur í vetur vunnið sjey dystir av fjúrtan í A-bólkinum í Champions League. Av mótstøðuliðum kunnu nevnast PSG, SC Magdeburg, Veszprém og GOG. Dinamo Bukarest vann í februar á danska meistaraliðnum GOG, og tapti tepurt fyri tyska stórfelagnum Magdeburg fyri nøkrum døgum síðani. 

Á rumenska landsliðnum, sum komið er til Føroyar, eru átta spælarar av hesum Champions League-liðnum.

Sama er venjarin - spaniólin Xavier Pascual Fuertes. Hann telist millum víðgtinastu venjarar, og stóð á odda fyri FC Barcelona frá 2009 til 2021. Nú stjórnar hann Dinamo Bukarest og rumenska landsliðnum.

Xavier Pascual

Caption: 
Xavier Pascual er venjari hjá Rumenska landsliðnum. Hann hevur drúgvar royndir sum venjari á høgum, altjóða støði. Millum annað hevur hann verið venjari hjá FC Barcelona. Í løtuni er hann venjari hjá stórspælandi Dinamo Bukarest.

 

Kroatiskur styrkur

Sum liður í royndunum hjá Rumenia at brynja seg til nýggja skýferð í altjóða manshondbólti, hevur ein av stórskjúttunum hjá Dinamo Bukarest - fyrrverandi kroaturin Ante Kuduz - júst fingið rumenskan ríkisborgararætt.

Hann hevur spælt á kroatiska landsliðnum, men í kvøld umboðar hann á fyrsta sinni nýggja heimlandið móti Føroyum í Høllini á Hálsi í Havn. 

Ante Kuduz

Caption: 
Fyrsti landsliðsdysturin hjá 27 ára gamla Ante Kaduz fyri Rumenia verður í kvøld, tá Rumenia skal spæla móti Føroyum í Høllini á Hálsi.

Vinstri bakkurin Kuduz er 2.01 til hæddar og vigar 91 kilo. Hann hevur verið ársins leikari í Dinamo Bukarest seinastu tvey árini, og verður hildin at vera rættur fongur hjá rumenska landsliðnum.

Hann spældi seinast á kroatiska landsliðnum í 2019. Seinastu fimm árini hevur hann verið yrkisleikari í Rumenia.

Skal annar stjørnuspælari hjá Rumenia nevnast, má tað vera hin bakkurin, Demis Grigoras, sum spælir í portugisiska stórfelagnum Benfica.

 

Spennandi avbjóðing

Tað er tí ikki sørt spennandi avbjóðing, sum stendur fyri framman hjá føroyska hondbóltslandsliðnum í kvøld. Áður hava Føroyar og Rumenia leikt seks dystir, og allir hava vit tapt - og tað so ruddiliga eisini.

Men føroyskur hondbóltur - ikki minst manshondbóltur - stendur í sínum fagrasta blóma. Vit hava ongantíð havt so góðar spælarar og so gott landslið sum júst nú.

Elias Ellefsen á Skipagøtu er við aftur, eftir at hann hevur havt ein lang steðg orsakað av skaða í knænum. Og við honum á vøllinum er systkinabarnið og unga stjørnuskotið, Óli Mittún. 

Karmarnir eru góðir. Høllin verður á tremur við fleiri enn 1.500 áskoðarum. Og Kringvarpið sendir sjálvandi beinleiðis frá dystinum í sjónvarpinum. 

Dysturin verður bríkslaður í gongd klokkan 19, men sjónvarpið byrjar longu at senda kl. 18.40.

Er kopiera
Nýggjastu sendingar í ÚV
Sunnudag 3. mars
Guðstænasta í Miðvágs kirkju
171555
Leygardag 2. mars
Jambalaja 020324
171544
Leygardag 2. mars
Upp á tá - 010324
171543
Leygardag 2. mars
Vikan 2. mars 2024
171542
Nýggjastu sendingar í SV
Sunnudag 3. mars
Guðstænasta úr Miðvágs kirkju
171556
Fríggjadag 1. mars
Veðrið
171531
Fríggjadag 1. mars
Veðrið
171519
Hósdag 29. februar
Fólksins rødd: Um veðrið (1:4)
171415
Mikudag 28. februar
Hondbóltur: Luksemburg - Føroyar
171389