Team Klaksvík ment seg nógv

Tað endaði við einum greiðum tapi, tí vertirnir vunnu 30-19, og vóru á odda 15-7 í hálvleikinum, men hetta heldur stovnarin skyldast, at hetta er nýtt fyri teir í Team Klaksvík.

Millum teirra, ið var til staðar í gjárkvøldið, tá ið Team Klaksvík spældi sín fyrsta altjóða dyst, var ein av stovnarunum og venjarin fyrstu árini, Fríðin Ziskason.

- Teir fyrstu 20-25 minuttirnar gjørdu munin, men aftan á tað var stórt sæð eingin munur á liðunum, sigur Fríðin Ziskason, ið væntar ein heilt annan dyst í morgin klokkan 14.

Seks lið úti í Europa
Team Klaksvík er eitt av tilsamans seks føroyskum hondbóltsliðum, sum í vetur royna seg í europeisku kappingunum, og tað er nógv tað mesta nakrantíð.

Seinnapartin í dag, klokkan 17, skulu menninir hjá Neistan spæla fyrra dystin ímóti ísraelska liðnum, Holon Yuvalim HC, og hann verður í høllini á Hálsi í Havn.

Hini bæði føroysku mansliðini, H71 og VÍF, sum eru við í EHF Europa Cup í ár, koma við í øðrum umfari og spæla sínar fyrstu dystir á útivølli, ávikavist 11. og 14. oktober.

Kvinnuliðini hjá H71 og Neistanum  fara eisini út í Europa at spæla, og tey koma bæði inn í øðrum umfari og spæla sínar fyrstu dystir á útivølli næsta fríggjakvøld.