Bogaskjóting: Jóannes mátti lúta fyri systkinabarninum

Jóannes Poulsen var favorittur, tá hann møtti systkinabarninum Kaj Johannesen í FM-finaluni í compound-bogaskjóting sunnudagin.

Meðan Kaj Johannesen skjýtur aftur eftir fimm ára steðg, hevur Jóannes Poulsen støðugt talst millum teir fremstu í Føroyum nógv tey seinastu árini.

Finalan var spennandi - sera spennandi - og tá allir pílarnir vórðu skotnir, stóð á jøvnum 143-143 millum systkinabørnini, sum báðir skjóta við Ørvi í Runavík.

Tí skuldi alt avgerast við shoot-off, har skjúttarnir hava ein píl í part og skulu raka so nær miðjuni sum til ber. 

Tann tvídystin vann Kaj Johannesen, sum tískil er føroyameistari í compound við monnum. Jóannes Poulsen kann troysta seg við, at hann vann grand prix-kappingarnar samanlagt.

Føroyameistarin í fjør Nikkel Petersen endaði á 4. plássi hesa ferð.