Eldraráðsval: Fyrsta talgilda val í Føroyum

Tá tað er val, eru vit von við at seta krossin við blýanti, og at onkur telur bunkar, men hetta valið fór øðrvísi fram. Tað var fyrsta talgilda valið í Føroyum. Fólk kunnu atkvøða umvegis Vangan. 

Jóhan Carl Dam fekk nógv flestar atkvøður. Hann fekk 688 atkvøður. Tað er hann ógvuliga glaður fyri og er fúsur at fara til verka. Eldraráðið hittist aftan á nýggjár. 

Les meira: Jóhan Carl toppskorari á eldraráðsvalinum

Tórshavnar kommuna er nøgd við hendan talgilda leistin. Tað sigur Eyðfríð Jacobsen, Heilsu- og umsorganarstjóri í Tórshavnar kommunu: "Sambært veljarunum var tað ómakaleyst at velja, og tey vóru væl nøgd. Møguliga er tað orsøkin til, at valluttøkan var hægri, enn hon plagar at vera. Síðst var hon umleið 45%, og hesa ferð var vallutøkan 49,6%", sigur Eyðfríð Jacobsen. 

Hetta er ikki síðstu ferð, at Tórshavnar kommuna hevur eitt talgilt val. Eins og tey hava eitt eldraráð, vilja tey hava eitt ungdómsráð. Í vár fara tey at skipa fyri ungdómsráðsvali, og tá fara tey at brúka somu talgildu skipanina.

Tað eru Talgildu Føroyar, sum hava ment skipanina, sum borgararnir atkvøddu við á Vanganum.

Nicolai Mohr Balle, stjóri á Talgildu Føroyum, var gestur í sjónvarpsstovuni.