Fyrsta albinohýsan skrásett í Føroyum

Nógv áhugavert djóralív finst kring Føroyar.

Hýsuna kenna vit - men nú er fyrsta albinohýsan komin inn á Havstovuna.

Hetta er nakað heilt serligt, sigur Helga Bára Mohr Vang, fiskifrøðingur á Havstovuni.

Fyrsta skráseting í Føroyum

- So vítt sum vit vita um, er hetta tann fyrsta albinohýsan, sum er blivin skrásett í føroyskum havøki, sigur Helga Bára Mohr Vang. 

Tað var Jón Bent Poulsen, sum fiskaði albinohýsuna fyri góðum mánaði síðani við línibátinum Anru.

Albinoýsan bleiv fiskað eystanfyri Svínoynna, og hetta er fyrsta av sínum slag, sum Jón Bent Poulsen hevur sæð í Føroyum.