Odmar: Ein dreymur at bera liðskiparabandið

Odmar Færø fekk ein dreingjadreym uppfyltan, tá hann bar liðskiparabandið í 4-0 stórsigrinum hjá Føroyum á Montenegro hóskvøldið.

 - Ja, tað er tað, sum mann droymir um, men samstundis roynir tú ikki at lata tað ávirka so nógv. Eg royndi bara at fokusera upp á mítt, og tað virkaði, sum spælararnir vístu álit aftur. Tað bleiv ein stór og stuttligt løta hjá okkum øllum, segði Odmar Færø til venjingina á Tórsvølli tíðliga seinnapartin leygardagin. Royndi verjuspælarin úr KÍ sigur seg ikki vera ein, sum rópar harðast, men heldur roynir at ganga á odda við egnum avriki.

Odmar færø er partur av ein sonevndum liðskiparabólki, sum er samansettur av fleiri av royndaru spælarunum í føroyska hópinum. Gongdin í løtuni er sera góð, og tí hevur ikki verið so stórur tørvur á hesum bólkinum, men sjálvt liðskiparabandið hevur skift arm nakrar ferðir í seinastuni.

Bæði Hallur Hansson, Viljormur Davidsen, Brandur Hendriksson Olsen og Odmar Færø hava átt ta uppgávuna undir Eyðuni Klakstein og Atla Gregersen.

 - Eftir mínum tykki hava allir, sum hava fingið ábyrgdina, gjørt tað øgiliga væl. Har eru fleiri um boðið, og um ein er uttanfyri í ein dyst ella longur vegna eitt ella annað, er ein annar maður klárur. So tað vísir eina ávísa styrki, sum vit hava í hópinum í løtuni, segði Odmar Færø.

Í morgin spæla Føroyar næstseinasta HM-undankappingardystin í hesi kappingini, tá Kekkia vitjar á Tórsvølli. Dysturin er klokkan 17.00, og Kringvarpið byrjar at senda klokkan 16.00.