NM í vektlyfting: Nú skulu vit fáa orkestrið at spæla

 - Nú skulu vit gleðast. Nú skulu vit fáa orkestrið at spæla.

Tað segði formaðurin í Styrkisambandi Føroya, Heini Hátun, nú fyrireikingarnar til Norðurlandakappingina í olympiskari vektlyfting eru í hæddini.

Um vikuskiftið skulu knapt 80 lyftarar úr øllum Norðurlondum kappast í Bylgjuni í Runavík.

 - Tey hava so góðar umstøður. Gólvið í hallunum skal halda til tað trýstið, sum er. Onkur lyftir kanska 200 kilo uppum høvd. Tað liggur væl í landinum. Tey kunnu koma norðanífrá, tey kunnu koma úr Havn, segði Heini Hátún.

SÍ EISINI: Gleða seg at lyfta um Norðurlandameistaraheitini í Føroyum

Kappingin er hørð. Fleiri av norðurlendsku luttakarunum hava longu gjørt um seg á altjóða pallinum og hava vunnið heiðursmerki við bæði EM og HM.

Heini Hátún tippar, at føroysku íðkararnir vinna tvey heiðursmerki.

 - Vit eru sjey, sum eru við, og vit hava veldugt potentiali, um vit sleppa at arbeiða leingi. Beint nú? Kanska tvær medaljur, segði Heini Hátún.

Føroysku lyftararnir eru Jenny Persson, Maibrit Reynheim Petersen, Julia Tormansdóttir Jacobsen, Pól Hendrikur Andreasen, Niels Áki Mørk, Leif á Bøgarði og Sofus Bech.