Svimjing: Pólsk vitjan stimbrar

Fjúrtan póllendingar vitjaðu Havnar Svimjifelag og kappaðust í Tórshavn Open. Hetta er stimbrandi hjá føroysku svimjarunum, ið soleiðis fáa nýggjar avbjóðarar og avbjóðingar

Pólsk vitjan: 14 pólskir svimjarar vitjaðu Havnar Svimjifelag síðsta vikuskiftið

Símun Christian Olsen

02.07.2024 - 20:28

Alt var ikki við tað gamla, tá Tórshavn Open var síðsta vikuskiftið.

14 pólskir svimjarar úr felagnum, Galicja Krakow, vitjaðu Havnar Svimjifelag og kappaðust við føroyingarnar.

Føroyski svimjiheimurin er lítil, og tí kemur vitjanin væl við, heldur nýggja forkvinnan í Havnar Svimjifelag.

- Tað er ikki nógv útskifting í, hvørjum vit kappast ímóti, uttan so at tú fert av landinum. Tí haldi eg, at tað er ordiliga spennandi, at tey koma her, segði Bjørg Ólavsdóttir.

Pólsku gestirnir eru yrkissvimjarar, sum venja tríggjar ferðir um dagin. Eina ferð á turrum og tvær ferðir í hylinum.