Badminton: Wong nýggjur landsliðsvenjari

Fai Yin Wong fær uppgávuna at fyrireika bestu føroysku badmintonspælararnar til komandi Oyggjaleikirnar á Orknoyggjum og teimum í Føroyum í 2027. Hann avloysir Sune Gavnholt sum venjari hjá føroyska badmintonlandsliðnum.

Fai Yin Wong hevur verið hjálparvenjari hjá landsliðnum síðstu fýra árini, og hann hevur fingið høvuðsvenjarastarvið í kapping við meir enn 10 aðrar umsøkjarar. 

30 ára gamli venjarin úr Malaysia hevur eisini verið høvuðsvenjari hjá Havnar Badmintonfelag síðan 2019, og skal halda fram har næstu trý árini.

 - Vit eru heilt sannførd um, at vit við Wong hava fingið rætta persónin at útinna ætlanir okkara í verki, sigur Katrin Jacobsen, forkvinna í Badmintonsamband Føroya.

 - Við einum trý ára sáttmála við Wong hevur BSF nú skapt tryggar karmar fyri eini menning av badmintonhópinum fram ímóti Oyggjaleikum á Orknoyggjum næsta summar og í Føroyum í 2027, skrivar BSF.