- Tíðindi, mentan og ítróttur
Plátubarrin
Vit spæla ta kanska mest klassisku rokk- og popprokkplátuna, sum danir góvu út í sjeytiárunum, 'Gas 5' hjá Gasolin'. Ein kann siga, at útgávan er vorðin eitt slag av kult, tí hon var tann fyrsti stórseljarin yvirhøvur í donskum rokki. Ein høvuðsgrund til tað er, at hon inniheldur nógv spældu løgini 'Rabalderstræde', 'Masser af succes', og 'Kvinde Min', ið fleiri ferðir - seinast í 2025 - hevur verið kosið tað besta danska kærleikslagið yvirhøvur. Teir mentu sín egna stíl við bæði heimligum og útlendskum íblástri, og enski framleiðarin, Roy Thomas Baker, fekk tónleikin at ljóða væl.
Talan er um ta útgávuna hjá Gasolin' og Kim Larsen, sum blaðmaðurin Rasmus Skovbo kallar: 'Danmarks Bedste Rokplade'.
Plátubarrin 1. november 2025
Plátubarrin
Plátubarrin er ein undirhaldssending við tónleiki í vetrarskrá Kringvarpsins. Sendingin er eisini interaktivt útvarp, og senditíðin er leygarkvøld frá klokkan 20:00 til klokkan 2:00.
Hvør sending byrjar við eini hugleiðing, ið byggir á eygleiðing av menniskjans atferð. Síðani verður Vertsins løta send til klokkan 20:45, tá tátturin Temaplátan fer frá, eins og annað tema er á skránni stutt fyri miðnátt.
Nærum tveir triðingar av Plátubarrini eru við lurtaraynskjum, ið sendast kunnu til nummar 224000, ella sum telduboð til facebooksíðuna, Plátubarrin.
Verturin, Jákup Magnussen, byrjaði at gera tónleikasendingar fyri Útvarp Føroya í 1982, og varð útbúgvin journalistur í 1993. Plátubarrin varð ljóðsett tann 16. februar í 2013.
