Trump hóttir við fleiri álopum - oljuprísurin hækkar

Amerikanski forsetin, Donald Trump, hótti í nátt enn einaferð Iran við at bumba landið í fleiri dagar, kemur Iran ikki til eina semju við USA.

- Vit fara at raka tey hart í kvøld, í annaðkvøld og kvøldið eftir. Í næstu viku bumba vit orkuverk og brýr - vit fara at bumba alt, um tey ikki koma til samráðingarborðið, segði Trump í Fox News í nátt. 

Altjóða oljuprísurin var slakar 86 dollarar fyri tunnuna í morgun. Áðrenn kríggið millum USA og Iran brast á, lá prísurin á ráolju - tað sum verður nevnt Brent Crude - millum 60 og 70 dollarar fyri tunnuna.

100 dollarar

Síðani hevur prísurin sveiggjað nógv, men hevur ligið um 100 dollarar fyri tunnuna.

Prísurin er lækkaður nógv seinasta mánaðin, tí útlit vóru til okkurt slag av friðaravtalu ella vápnahvíld, og útlit vóru eisini fyri at Hormuz-sundið fór at lata uppaftur fyri skipaferðslu. Oljuprísurin kom heilt niður á 70 dollarar fyri tunnuna.

Nú er aftur kríggj. Trump hóttir og USA setur stongsil í verk. Tað sæst aftur í oljuprísinum.