Útbygging á havnarlagnum í Hósvík ávirkar ikki náttúru og umhvørvi

Umhvørvisstovan heldur, at ætlaða útbyggingin á havnarlagnum í Hósvík fer ikki at hava munandi ávirkan á náttúru og umhvørvi.

Umhvørvisstovan grundar hetta á umsókn og aðrar upplýsingar frá Sunda kommunu.

Ætlanin er at flyta pirin í Hósvík longri út.

Hann verður bygdur sum grótútfylling.

Grótið kemur frá verandi piri og frá útstykking oman fyri bátahylin, tilsamans 5.146 rúmmetrar.

Biofar gjørt kanning

Í sambandi við verkætlanina hevur Biofar gjørt lívfrøðiliga kanning og frágreiðing um umhvørvi og djóralív niðan fyri sjóvarmálan.

Dentur er lagdur á at kanna økið, sum er natúrligt búlendi.

50 djórasløg blivu staðfest við sýnistøku við grabba, og 52 sløg blivu staðfest við eygleiðing. Átta sløg eru staðfest í báðum kanningum. 

Einki sjáldsamt slag ella fyribrigdi kundu staðfestast í kanningini.

Niðurstøðan í kanningini hjá Biofar er, at búlendið í økinum er vanligt bæði í altjóða og føroyskum høpi. 

Avgerðin hjá Umhvørvisstovuni um at geva Sunda kommunu loyvi til at útbyggja havnina í Hósvík kann kærast landsstýriskvinnuna í umhvørvismálum.