Søguligur sigur gevur almennan frídag í Kongo

Søguligur sigur gevur almennan frídag í Kongo
Fyri fyrstu ferð í 52 ár er Demokratiska Lýðveldið Kongo í einum HM-endaspælið, og myndugleikarnir hava valt at geva fólkinum frí í dag - fyri 52 árum síðan var støðan øðrvísi
 
01.04.2026 - 19:10

Myndugleikarnir í demokratiska lýðveldinum Kongo hava lýst dagin í dag sum almennan frídag, eftir at fótbóltslandsliðið hevði spælt seg víðari til HM fyri fyrstu ferð í 52 ár. 

Le Leopards, sum landsliðið verður rópt, vann úrtøkudystin móti Jamaika 1 - 0, tá ið Axel Tuanszebe í longdu leiktíðini skoraði avgerandi málið.

Arbeiðs- og vinnumálaráðið í Demokratiska lýðveldinum Kongo avgjørdi tí, at afturfyri søguliga úrslitið, kundi tjóðin fáa frí í ein dag at hátíðarhalda samleika, eldhuga og tjóðarstoltleika.

Mið-afrikanska landið hevur bert eina ferð áður spælt seg víðari til HM, - tað var í 1974, tá æt landið Sair.

Forsetin hótti landsliðið
Í HM-endaspælinum í 1974 spældi Sair (nú Demokratiska Lýðveldið Kongo) tríggjar dystir, sum allir endaðu við tapi: 0-2 fyri Skotlandi, 0-9 fyri Jugoslavia og 0-3 fyri Brasilia.

Men tann síðsti dysturin - dysturin móti Brasilia - gjørdist serligur.

Undan dystinum hevði forsetin ella einaræðisharrin, Mobutu Sese Seko, hótt spælararnar: Taptu teir 0-4 ella meira, so sluppu teir ikki heim aftur.

Stutt undan leiklok var Brasilia á odda 3-0, men fekk tá eitt fríspark beint uttanfyri brotsteiginum hjá Sair, og tá hendi ein av mest kendu løtunum í HM-søguni. Dómarin bríkslar at Brasilia skal skjóta frísparkið, men ístaðin var tað verjuspælarin Mwepu Ilunga hjá Sair, sum rann fram og sparkaði bóltin burtur, áðrenn frísparkið yvirhøvur varð tikið.

Í mong ár varð hetta tulkað sum fávitska. Men veruleikin var, at hann gjørdi tað við vilja – fyri at vinna tíð og órógva mótstøðuliðið, tí óttin fyri avleiðingunum var stórur.

Brasil vann 3-0, og Sair slapp undan størri tapi – og spælararnir sluppu harvið heim til síni kæru.

Frísparksstøðan sæst her:

https://youtu.be/XeMILGMJTb8?si=POYUePXoCWiphJqC

 

Er kopiera
Nýggjastu sendingar í ÚV
Sunnudag 15. november
Bolero - Niels V. Gade
216433
Sunnudag 15. november
Guðstænasta í Haldarsvíkar kirkju
216428
Sunnudag 15. november
Filosofiskur 8.partur
216351
Leygardag 14. november
TEMAPLÁTAN 40: 'Fahrenheit', Toto, 1986
215932
Nýggjastu sendingar í SV
Sunnudag 15. november
Møti
216442
Sunnudag 15. november
Eitt dýpi av dýrari tíð 2:2
216214
Sunnudag 15. november
Talvið um Tinganes (2:2) - teknmálstulkað
216435