Fótbóltskvinnurnar í Kýpros: Álopini hava loypt ótta á

Føroyska fótbóltslandsliðið við kvinnum spælir í dag venjingardyst í Kýpros, hóast Iran hevur rakt miðjarahavsoynna við rakett- og dronuálopum um vikuskiftið.

 - Tær hendingarnar, sum vóru um vikuskiftið, hava loypt ótta á liðið hjá okkum og hava órógva uppihaldið hjá okkum í Kýpros, sigur aðalskrivarin í Fótbóltssambandi Føroya Kristin Dam Ziska.

FSF hevur verið í samband við myndugleikararnar á staðnum, fótbóltssambandið í Kýpros og evropeisku fótbóltssamgonguna UEFA, og hevur fingið vissu fyri, at tað er trygt at spæla dystin.

 - Vit sum sita í Føroyum vita sjálvandi ikki, hvussu umstøðurnar eru á staðnum, men okkara fólk í Kýpros og vertirnir hjá okkum meta, at tað er púra trygt at spæla dystin, sigur Kristin Dam Ziska, sum leggur afturat, at hvøkkurin millum spælararnar hevur lagt seg, og kvinnurnar kenna seg til reiðar at fara á vøllin. 

 - Vit halda fram, sum ætlað, spæla dystin í dag, og síðan fer liðið víðari til Grikkalands í morgin, sigur aðalskrivarin.

Venjingardysturin ímóti Kýpros er liður í fyrireikingunum til HM-undankappingina, og fyrsti dysturin er ímóti júst Grikkalandi leygardagin.