Herverk á bilar í Havn

Herverk heur verið á fleiri bilar í miðbýnum í nátt, 

Løgreglan heitir á fólk, sum búgva nærhendis Tvørgøtu og Brekkugøtu um at kanna um teirra bilur hevur verið fyri herverki ella stuldri. 

Talan er um buglur, brotnar rútar og stuldur í ólæstum bilum. 

Tað var um midnáttarleitið, at løgreglan fekk fráboðan frá einum vitni um, at tveir mans gjørdu seg inn á fleiri bilar í økinum kring Tvørgøtu og Brekkugøtu í miðbýnum í Havn.

Løgreglan hevur tveir mans í varðhaldi, sum eru undir illgruna fyri at hava framt herverkið - men teir eru í løtuni ikki egnaðir til avhoyringar, tí teir eru ávirkaðir, sigur vakthavandi á politistøðini. 

Talan er ikki um ungdóm, men um tveir vaksnar menn. Teir eru útlendingar og ikki gamlir kenningar hjá politiinum sambært vakthavandi. 

Tað er óvist, hvussu nógvir bilar hava verið fyri herverki - ein leyslig meting er fimm bilar, men talan er møguliga um fleiri.

Løgreglan heitir á fólk sum búgva í økinum um at kanna bilin fyri herverk og um hann hevur staðið ólæstur - stuldur. 

Løgreglan mælir eisini fólki til at læsa bilin, tá tey fara frá honum.