Tað verður ungt, tungt, hart og hoyrt í LEITISSTEIN

Tað var einaferð, at rokktónleikurin ráddi fyri borgum á bæði altjóðá og heimliga tónleikapallinum. Tað eru nú nokk so nógv ár síðani. 

Men okkurt tykist broytt, tí rokkurin hevur aftur fótað sær bæði á altjóða og heimliga tónleikapallinum. 

Í USA gongur bólkurin Turnstile undan, í Danmark blaðungu menninir í Ashes of Billy, meðan her heima er tað Tunghoyrt. 

Tunghoyrt kom við buldur og brak inn í hvørja stovu í landinum, tá bólkurin bergtók við einari sera orkufyltari Sement-luttøku í fjør. 

Gingið við rúkandi ferð

Síðani hevur tað gingið við fúkandi ferð hjá ungu monnunum, sum nú eru klárir við sínari fyrstu EP, ið hevur fingið hóskandi navnið "Ójó". 

Og í dag vera ungu menninir í Tunghoyrt gestir í LEITISSTEIN live í útvarpinum klokkan 13, og teir gleða seg. 

Ímyndin av einum rokkbólki

Tunghoyrt er ímyndin av einum góðum rokkbólk.

Bólkurin hevur ein sera karismatiskan oddamann í Jóna Strøm, ið syngur og skilir, at hann skal tøla áhoyrararnar, ein knasandi dugnaliga gittarleikara, Helge Marius Greve, og so eina góða grund við Erik Reynheim á bassinum og Bjarna Jakobsen á trummunum. 

"Ójó" er ein myrk og rá EP, har Tunghoyrt granska tær mest óhugnaligu síðurnar av menniskjaligum kenslum og atburði.

EPin ferðast gjøgnum evni sum tráan, øvund, miss og moralskt forfall – søgur har innara stríðið spakuliga vendir seg til oyðleggjandi handlingar.

Tunghoyrt, Ójó

Sanglisti:
1. Raptus
2. Tupilak
3. Ikki skríggja
4. Eysturav
5. Halt teg vekk
6. Tveitan

Framleiðsla: Benjamin Petersen
Permumynd: Gwenaël Akira Helmsdal Carré
Grafikk:Jónsvein Mikkelsen
Mastering: Raelynn Janicke Mastering Engineer Infrasonic Sound
Útgivið: TUTL