Bryggjukanturin á Syðradali má leingjast

- Royndarsiglingin, og váðametingarnar, sum vórðu gjørdar frá oktober í fjør, vístu, at tað ber ikki at brúka Teistan at sigla á Kalsoyarleiðini undir verandi umstøðum. Bryggjukanturin má leingjast við 60 til 70 metrum og fyrr enn tað er gjørt, verður Teistin ikki settur í sigling á Kalsoyarleiðini.

Tað sigur Dánjal Samuelsen, virkandi stjóri á Strandfaraskipum Landsins, tá vit spyrja hann, hvussu verður við Teistanum sum Kalsoyarskip.

Ætlanin var at seta Teistan í sigling á Kalsoyarleiðini, men áðrenn tað kundi gerast, mátti rampan skiftast, tí gamla rampan var ov lítil til eina so stóra ferju sum Teistin er. Tað arbeiðið varð gjørt síðsta summar, men tá royndir vórðu gjørdar við Teistanum frá oktober og nakað fram, var niðurstøðan, at tað var ikki nóg trygt hjá skipinum at sigla, serliga tá tað var ringt í sjónum, sum tað er við jøvnum millumbilum, millum annað, tí tað rekur hart í økinum og so sjálvandi tá tað er vanliga óslætt.

Tí er leiðslan í Strandfaraskipum Landsins komin til ta niðurstøðu, at bryggjan má leingjast. Tað skal hon so kortini, tá nýggja kalsoyarferjan einaferð kemur, men skal Teistin setast inn, og tað er ynskið, so má arbeiðið gerast nú.

Hetta er ikki ein uppgáva, sum Strandfaraskip Landsins taka sær av og Dánjal Samuelsen, virkandi stjóri, hevur tí biðið Landsverk seta gongd á tað arbeiðið.

Nær arbeiðið verður gjørt og hvat tað kostar, veit Dánjal Samuelsen ikki, og tí ber heldur ikki til hjá honum at siga nakað um, nær Teistin verður settur í sigling.

Trýst á pílin niðanfyri fyri at hoyra alt innslagið, sum var í tíðindunum á middegi.