Pengar frá Frískúlanum fara til barnahús á Listasavninum

Tað var í andanum hjá Frískúlanum í Havn, at pengarnir skuldu nýtast til børn og listarligt virksemi

Listasavnið skal um- og útbyggjast fyri meira enn 70 milliónir kr. Barnahús verður eisini í savninum.

21.01.2026 - 08:16

Nýggja barnahúsið á Listasavninum fær allar pengarnar, sum vóru eftir, tá Frískúlin í Havn gavst í oktober 2024.

- Tað var í andanum hjá Frískúlanum, at pengarnir skuldu nýtast til børn og listarligt virksemi, sigur Sharon Weiss, sum var við til at stovna Frískúlan.

Løgtingið viðger í løtuni eitt uppskot um at umbyggja og útbyggja Listasavn Føroya. Málið er í løtuni í fíggjarnevndini.

Frískúlin í Havn og Listasavnið

Listasavnið hevur fingið 430.000 kr. frá Frískúlanum í Havn, sum gavst í oktober 2024.

Sambært lógaruppskotinum fer arbeiðið at kosta tilsamans 70,8 milliónir krónur. Landskassin fíggjar í mesta lagi 24,3 milliónir, Tórshavnar kommuna stuðlar við 5,5 milliónum, og restin, 41 milliónir, koma úr trimum donskum grunnum.

Barnahúsið er partur av útbyggingini. Stuðulin frá Frískíúanum í Havn, 430.000 krónur, fer til ætlaða virksemið í barnahúsinum, har list skal fylla nógv.

Hoyr innslag í útvarpstíðindunum:

21012026_Barnahus