Meiningakanningar: Amerikanarar eru ímóti at taka Grønland

Tríggjar nýggjar meiningakanningar geva innlit í, hvat fólkið í USA heldur um ætlaninar hjá amerikanska forsetanum um Grønland.

Tað skrivar BBC. 

Ein CNN-kannig, har 1.200 vaksnir amerikanarar eru spurdir, vísti, at 25 prosent taka undir við amerikonsku royndini at taka Grønland, 75 prosent eru í móti. 

Sama kanning vísti eisini, at spurningurin kloyvir flokkin hjá forsetanum sjálvum, har helmingurin av teimum spurdu, sum eru republikanarar, taka undir við ætlanini hjá Trump, og helvtin er ímóti.

Ein onnur Isos/Reuters-kanning, har 1.217 amerikanarar eru spurdir, og sum var gjørd 12. og 13. januar, vísti, at bara 17 prosent stuðla amerikonsku royndini at taka Grønland.

Ein YouGov-meiningakanning, har 2.223 vaksnir amerikanarar eru spurdir - kanningin varð gjørd 7. januar - vísir, at 28 prosent taka undir við, at USA keypir Grønland, 45 prosent eru ímóti.

Spurd, um Grønland skal takast við hervaldi, svara 73 prosent, at tey eru ímóti, og átta prosent eru fyri.