Milliónir í leigustuðli

Í 2024 vóru leiguinntøkurnar fyri bústaðir 92 mió. kr. sambært tølum hjá Taks.

1.150 matriklar vóru leigaðir, so miðalleigan var 6.700 um mánaðin. 

Men privatir leigubústaðir eru helst eitt sindur fleri enn 1.150, tí fleiri enn eitt leigumál kunnu vera á sama matrikli, sigur Taks eisini.

Harumframt eru leysliga mett 700 til 800 vinnulig leigumál, meginparturin er hjá Bústøðum og Mark. 

Fáa til dømis 1.000 húski í miðal 1.000 kr. um mánaðin í leigustuðli, kostar tað landskassanum 12 mió. kr. í ár,.

Verður talan um 1.200 húski, sum í miðal fáa 1.200 kr. um mánaðin, kostar leigustuðulin 17 mió. kr. í ár.

Uppskot er gjørt um lóg um leigustuðul, og tað er til hoyringar í løtuni.

Stuðulin verður 20 prosent av húsaleiguni, tó í mesta lagi 1.500 kr. um mánaðin. 

Húski við einum vaksnum, sum hevur inntøkugrundarlag upp til 350.000 kr., kunnu fáa fullan 
leigustuðul. 

Leigustuðulin minkar fimm prosent av inntøkuni, sum er yvir 350.000 kr.

Inntøkan avgerandi 

Húski við tveimum ella fleiri vaksnum og inntøkugrundarlagi upp til 500.000 kr., fáa fullan 
leigustuðul. 

Og eisini har minkar stuðulin fimm prosent av inntøkuni, sum er yvir 500.000 kr.

Bara langtíðarleigumál, tað eru leigumál, sum vara longri enn tríggjar mánaðir, fáa leigustuðul.

Almannaverkið sigur, at brúk verður fyri tveimum til fýra fólkum at umsita leigustuðulin.

Ætlanin er, at lógin kemur í gildi 1. juli.

Fyrsti stuðulin verður latin í august.

Les uppskotið her.