Íslendska vinnan misnøgd við makrelsemjuna

Stór misnøgd er í Íslandi við makrelsemjuna, sum Ísland, Noreg, Bretland og Føroyar hava gjørt.

Íslendingar halda, at teirra partur er ov lítil.

Felagið hjá fyritøkunum í fiskivinnuni er misnøgt, tí íslendski luturin, sum var 16,5 prosent, áðrenn Ísland fór upp í semjuna, nú er 10,5 prosent.

Serliga heldur felagið lítið um, at føroyska kvotan er størri enn tann íslendska.

Einki stuðlar teirri avgerðini, sigur íslendska fiskivinnan, tí meiri makrelur er í íslendskum sjógvi enn í føroyskum. Fiskivinnan sigur eisini, at eingin annar í semjuni hevur latið so nógv sum Ísland.

Marianne Sivertsen Næss

Marianne Sivertsen Næss. (Mynd: Vesterålen)

Norðmenn fegnast

Norski fiskivinnuráðharrin, Marianne Sivertsen Næss, er ovurfegin.

Hon fegnast millum annað um, at Ísland nú er við í makrelsemjuni.

Marianne Sivertsen Næss sigur, at endamálið er framvegis at fáa ES og Grønland við í makrelsemjuna.  

Eisini skotska uppsjóvarvinnan heitir á ES og Grønland um at fara upp í semjuna.