Fara ikki í Landsrættin við máli um lokking

Ákæruvaldið fer ikki í Landsrættin við einum dómi hjá Føroya rætti fyri grooming, lokking og onnur revsilógarbrot.

Ein 31 ára gamal maður var dømdur 30 dagar treytaleysa fongsulsrevsing fyri lokking og fyri roynd at lokka. 

Men hann var frídømdur fyri tvær ákærur.

Hann er frídømdur fyri blúnisbrot, roynd at hava samlegu við gentu, sum var yngri enn 15 ár, og fyri at deila pornografiskt tilfar um gentu, sum var 12 ár. 

Frídømdur fyri neyðtøku

Hann er eisini frídømdur fyri neyðtøku við aðrari kynsligari gerð enn samlegu, har hann á Snapchat fekk eina 15 ára gamla gentu at gera kynsligar gerðir við seg sjálva í minsta lagi tíggju ferðir.

Ákæruvaldið væntar ikki at kunna sannføra Landsrættin um, at maðurin er sekur. Maðurin noktar seg sekan í øllum trimum ákærum.

Hóast maðurin var dømdur í einum føri, fer hann heldur ikki í Landsrættin við málinum, sigur verji hansara, Jógvan Páll Lassen.

So dómurin hjá Føroya rætti í fyrsta rættarmálinum í Føroyum um lokking er endaligur.