Semja um makrelin - kunnu fiska 300.000 tons næsta ár

Makrelkvotan lækkar ikki so nógv næsta ár, sum ICES upprunaliga mælti til. 

Bretland, Norra, Ísland og Føroyar eru samd um, at mest loyvda veiðan eftir makreli verður 299.000 tons næsta ár.

Skerjingin er 48 prosent, samanborið við makrelkvotuna í ár.

Í heyst mælti ICES til at skerja fiskiskapin eftir makreli heili 70 prosent næsta ár, sammett við í ár. Tilráðingin hevði við sær, at makrelkvotan fór úr 577.000 tonsum niður í 174.000 tons.

Í avataluni, sum varð undirskrivað í gjár, vísa strandalondini á sonevndu "Fmsy meginregluna" hjá ICES. Tað verður brúkt sum grundgeving fyri einans at lækka kvotuna 48 prosent, niður í 299.000 tons.

Føroyar eiga 12 prosent av heildarkvotuni. Tað merkir, at føroyska makrelkvotan verður 35.880 tons næsta ár.

Bretland fær størsta partin

Bretland fær størsta partin av makrelkvotuni, tilsamans 30,55 prosent. Norra fær 26,4 prosent, Føroyar fáa sum nevnt 12 prosent, og Ísland fær 10,5 prosent. Ísland var ikki við í makrelavtaluni fyri 2025, men ásetti sær sína egnu kvotu.

Hetta er prosentbýtið, eftir at strandalondini hava rinda fyri atgongd at fiska makrelin, tá hann er bestur. Tað er í norskum og bretskum sjógvi.

Føroysk skip sleppa eisini næsta ár at fiska 35 prosent av makrelinum í bretskum sjógvi og 40 prosent í norskum sjógvi. 

Ísland sleppur at fiska 30 prosent av síni makrelkvotu í føroyskum sjógvi.

Tilsamans hava strandalondini Bretland, Norra, Føroyar og Ísland ásett sær sjálvum 79,45 prosent av heildarkvotuni. 

Tí eru einans góð 20 prosent eftir til onnur lond at fiska, eittnú ES og Russland.

Semjan kann lesast her.