Norra vann á treiskum týskarum

Norra er heimsmeistari í hondbólti við kvinnum eftir tepran 23-20 finalusigur á Týsklandi í Rotterdam.

Norsku kvinnurnar høvdu vunnið allar sínar dystir í kappingini við 15 málum í miðal, men týskarar løgdu einki í hagtølini, tí í Ahoy Arena trýstu teir Norra nærum allan dystin.

Katrina Lunde spældi sín síðsta dyst í málinum hjá Norra, og var tað ikki fyri stórspælinum hjá 45 ára gomlu legenduni, sum lá á bjargingarprosentið omanfyri 40 prosent, er ikki vist, at Norra vann dystin.

Full ferð frá byrjan

Tað var full ferð á fyrstu løtuna í Rotterdam, har liðini skiftust um at skjóta mál við stuttum millumbili.

Ferðin minkaði kortini aftur, og ágangandi týska verjan fekk bilbugt við Henny Reistad, sum einki mál skeyt fyri steðgin. Tí mátti Norra fara til hálvleiks við javnleiki 11-11.

Stórskjúttin skeyt fyrsta málið fyri steðgin, og Norra hótti við at fara frá miðskeiðis í seinna hálvleiki. Týskararnir hildu kortini fast, og skjótt var aftur meir ella minni javnt.

Talan var um nervakríggj eina løtu, men royndirnar komu Norra til góðar. Týskland mátti royna seg við úrslitaleysum sjey ímóti seks spæli, og tá Vilde Ingstad skoraði í síðsta minutti var leyst og liðugt.

Norra vann og hevur nú fulla skjáttu - Olympiskur meistari, evropameistari og heimsmeistari - meðan týskarar vístu, at teir nú teljast millum heimsins bestu.