Donsk fregnartænasta sigur USA vera hóttan móti trygdini í Danmark

Nýggj frágreiðing hjá fregnartænastuni hjá donsku verjuni, FE,  metir USA sum hóttan móti trygdini í Danmark, skriva fleiri danskir miðlar.

Tað er fyrstu ferð, at USA verður nevnt sum ein partur av hóttanarmyndini móti Danmark í nýggju hóttanarmetingini hjá fregnartænastuni hjá donsku verjuni.

- USA brúkar nú sína búskaparligu og tøkniligu megi - eisini ímóti sínum samstarvsfeløgum, stendur m.a. í metingini, skrivar danska kringvarpið.

Nýggja hóttanarmetingin nevnir eisini Russland og kríggið í Ukraina.

Vaksandi hóttan úr Russlandi

Fyrr í ár gav fregnartænastan hjá donsku verjuni út eina hóttanarmeting, har sagt var, at hernaðarliga hóttanin úr Russlandi fer at vaksa næstu árini

Tó var einki sagt um, at hóttan var um beinleiðis álop á Danmark.

Sama er galdandi í nýggju metingini. Har stendur eisini, at hernaðarliga hóttanin úr Russlandi móti NATO fer at økjast.

Men hóttanin um beinleiðis hernaðarligt álop úr Russlandi ímóti Grønlandi og Føroyum líkist ikki hóttanini ímóti Danmark. 

Russland sær ivaleyst Grønland og Føroyar í norðuramerikanskum samanhangi, og tað merkir, at Russland ikki neyðturviliga fer at draga Føroyar og Grønland inn í eina evropeiska ósemju, stendur í frágreiðingini.