Inntøkurnar hjá landskassanum minka

Inntøkurnar hjá landskassanum næsta ár vera 46 milliónir krónur minni enn met var, tá uppskotið um fíggjarlóg fyri 2026 kom í løgtingið 30. september.

Tað siga nýggjastu tølini, sum fíggjarnevndin hevur fingið úr Fíggjarmálaráðnum.

Landsskatturin verður 25 milliónir minni, og meirvirðisgjaldið verður eisini 25 milliónir minni, sigur metingin, sum nú er gjørd.

Avgjald á fiskitilfeingi verður 23 milliónir minni, men loyvisgjaldið hjá alivinnuni verður fýra milliónir størri.

Landskassin fær 12 milliónir meira frá feløgum og grunnum, sum landið eigur ella eigur í.

Millum annað er størri vinningsbýti væntað frá Føroya tele.

Og 10 milliónir meira vera endurrindaðar fyri keypsmvg.

Minni kvotur

Landsskatturin minkar, tí uppisjóvarkvoturnar, serliga makrelkvotan, minka næsta ár.

Tí fara hýrurnar at vera minni í 2026. 

Fíggjarmálaráðið væntar tó, at nakað verður fingið inn aftur við, at fiskimenn fara at fáast við annað løngevandi arbeiði. 

Gongdin í ár ger, at Fíggjarmálaráðið nú væntar minni meirvirðisgjald næsta ár enn tað gjørdi, tá uppskotið um fíggjarlóg var gjørt.

Loyvisgjaldið gevur meira, tí tøkan er mett at vera størri.

Avgjaldið fyri fiskatilfeingi verður minni, tí minni kemur frá svartkjafti og makreli.