Nethanyahu samráðast við Trump um víðari ætlanir í vápnahvíldini

Ísraelski forsætisráðharrin, Benjamin Nethanyahu, sigur seg vera til reiðar at samráðast við amerikanska forsetan, Donald Trump, um seinna stigið í amerikonsku ætlanini um vápnahvíld.

Tað boðaði hann frá á felags tíðindafundi við týska samveldiskanslaranum, Friedrich Merz.

Seinni í mánaðinum fer hann at samráðast við amerikanska forsetan, Donald Trump, um, hvussu næsta stigið í ætlanini kann fremjast, segði Benjamin Nethanyahu á tíðindafundinum.

Netanyahu segði, at hann fer at tosa við Trump um, hvussu ein kann fáa enda á ræðinum hjá Hamas í Gasa, skrivar tíðindastovan Reuters.

Vápnahvíldin millum Ísrael og Gasa kom í gildi 10. oktober. Upprunaliga ætlanin hjá Trump forseta byggir á 20 stig.

Seinna stigið í ætlanini snýr seg um at avvápna Hamas og Gasageiran. Hetta merkir millum annað, at undirstøðukervið og tunlarnir hjá Hamas skulu oyðileggjast, skrivar danska TV2.

Síðan vápnahvíldin var undirskrivað, hava báðir partar í fleiri umførum ákært hvønn annan fyri at bróta vápnahvíldina.