Lakasti fyrri hálvleikur undir HM

Ein løtu sá út til, at Ísland fór at stinga heilt av frá Føroyum í fyrra hálvleiki. 

Júst um Ísland skuldi leggja seg framum við sjey málum, so fingu Føroyar vent keðiligu gongdini. 

14-16 í hálvleikinum. 

Annika steðgaði bløðingi

Tað er serliga Anniku Fríheim Petersen í málinum fyri at takka, at Føroyar ikki eru aftanfyri við meira enn tveimum málum.

Enn einaferð kom hon inn í málið og steðgaði føroysku bløðingini við nøkrum frálíkum bjargingum. 

Tað skerst tó ikki burtur, at føroyska verjan hevur sæð nakað tung út, meðan í álopinum spøkja gomlu trøllini - brendu kjansirnir frá vengrunum.

Serliga Lív Poulsen hevur havt tað trupult móti besta íslendska leikaranum, ið tíverri stendur í málinum, risin Hafdis Renötudottir. 

Hinvegin hevur Rannvá Olsen á hinum vonginum skorað upp á báðar sínari møguleikar. 

Føroyar, Ísland, HM25, Dortmund, Jana Mittún

Mynd: Anze Malovrh / kolektiff

Sterkari í seinna hálvleiki

Tað er lítið at siga til, at neyvleikin í álopinum og orkan í verjuspælinum ikki er hin sama, tí tað er eyðsæð, at møðin byrjar at síggjast á føroysku leikarunum. 

Tær hava spælt seks harðar dystir í eitt rættiliga stutt tíðarskeið, og vunnið sær fimm stig. 

Møðin er ikki bara kropslig, men nokk eisini mental. 

Gleðiligt er tað, at Maria H. Weyhe er komin inn og hevur skorað upp á tvey brotskøst. 

Og Jana Mittún, hon gongur enn einaferð á odda við fimm málum. 

Higartil í HM-endaspælinum hava føroysku kvinnurnar verið stinnari í seinna hálvleiki enn í tí fyrra. Tí er vón fyri, at Føroyar fara at koma út til seinna hálvleik við øðrvísi orku. 

Hagtøl frá dystinum síggjast HER.