Seinasti bólkur fer skjótt at spara til eftirløn

Fólkapensjónistar, sum hava verið fyritíðarpensjónistar, fara nú at fáa eftirlønarviðbót saman við fólkapensjónini.

Uppskotið hjá Almanna- og Mentamálaráðnum um tað er sent til hoyringar.

Fyritíðarpensjónistar eru nú einasti samfelagsbólkur, sum ikki sparir saman til egna eftirløn. 

Endamálið við uppskotinum er at minka munin á fíggjarligu umstøðunum hjá fólkapensjónistum, sum gjøgnum arbeiðslívið hava spart saman til egna eftirløn, og hjá fólkapensjónistum, sum hava verið fyritíðarpensjónistar. 

150 fólk flyta frá fyritíðarpensjón til fólkapensjón um árið. 

Broytingin fer at kosta 350.000 kr. í 2026 og eina millión í 2027.

Um 40 ár fer hon at kosta landskassanum 15 mió. kr.

Ein onnur broyting er, at ásetingin um, at barnaviðbót ikki kann veitast í brotum, verður strikað.

Tað merkir, at fólk, sum fær brotpensjón og hevur rætt til barnaviðbót, fer at fáa barnaviðbótina í somu brotum.