Nevningating um álopið við Sandá verður í mars

Tá 36 ára gamli maðurin, sum er ákærdur fyri at leggja á eina kvinnu á gøtuni við Sandá, skal í Føroya rætt í mars, hevur hann verið í næstan tvey ár í varðhaldi.

Ætlanin var at hava nevningatingið í desember, men tá lá ikki fyri hjá verjanum hjá manninum. 

Kvinnan, sum var álopin á gøtuni við Sandá á Argjum sunnukvøldið 28. apríl í fjør, var, sambært ákæruritinum, í lívsvanda.

Hann rýmdi, tá ein onnur kvinna kom fram á tey.

Maðurin noktar seg sekan.

Fer at krevja trygdarvarðhald

Ákæruvaldið fer ikki at krevja fongsulsrevsing, men trygdarvarðhald, ella forvaring.

Tað krevur eisini, at maðurin, sum er póllendingur, verður vístur av landinum med alla. Fyrivarni er fyri endurgjaldi.

Fýra dagar eru settir av til nevningatingið.

Maðurin var tikin stutt eftir hendingina, og hevur verið í varðhaldi síðani.

Hann skal nú vera í varðhaldinum, til nevningatingið verður í mars.