Álopið við Sandá: Harðar ákærur og krav um trygdarvarðhald

Kvinnan, sum var álopin á gøtuni við Sandá á Argjum sunnukvøldið 28. apríl í fjør, var í lívsvanda.

Nú ákærurit er skrivað, fæst innlit í, hvussu grovt álopið var sambært politinum og ákæruvaldinum.

Ein 36 ára gamal maður er ákærdur fyri serliga vandamikla ella undir serliga tyngjandi umstøðum neyðtøku við øðrum kynsligum sambandi enn samlegu og serliga vandamikla ella undir serliga tyngjandi umstøðum neyðtøkuroynd.

Og maðurin er ákærdur fyri serliga rátt, harðrent og vandamikið likamsálop.

Hann leyp á kvinnuna aftanífrá, so hon fór um koll, tók hart kvørkratak, sum gjørdi, at hon fekk ikki andað og var um at missa vitið.

Hann sat á búki hennara. Kvinnan var við barn. Hon var í 29.viku.

Brúkti stein

Harafrat sló hann hana fleiri ferðir hart í høvdið við einum steini ella øðrum.

Kvinnan fekk skaða í høvdið, andlitið og á kroppinum.

Kvinnan bardist móti manninum, sum at enda rýmdi.

Maðurin noktar seg sekan.

Ákæruvaldið fer ikki at krevja fongsulsrevsing, men trygdarvarðhald, ella forvaring.

Útvísing med alla

Tað krevur eisini, at maðurin, sum er pólskur, verður vístur av landinum med alla.

Fyrivarni er fyri endurgjaldi.

Ákæruvaldið vil hava nevningating at viðgera málið.

Og tað vil hava rættin at seta av fýra dagar til viðgerðina.

Miðað verður eftir, at viðgerðin verður fyrst í desember.  

Maðurin var tikin stutt eftir hendingina og hevur verið í varðhaldi síðani.