Trump væntar ikki at Ukraina fer at vinna kríggið

Amerikanski forsetin, Donald Trump, væntar ikki,  at Ukraina fer at vinna kríggið.

- Tey kunnu vinna. Eg rokni ikki við tí, men tey kunnu vinna, sigur Trump, forseti, sambært Reuters tíðindastovuni.

Hann sipar til Ukraina, sum hevur verið í kríggi við Russland, síðani Russland gjørdi innrás í Ukraina í 2022.

Sambært Reuters sigur Trump, forseti, at gongd er í royndini at fáa eina avtalu í lag millum partarnar. Hann sigur eisini, at hann hevur biðið Russland gevast við at leypa á sivilfólk.

Uttanríkisráðharrar tosaðu í telefon

Marco Rubio og Sergej Lavrov, sum eru ávikavist amerikanskur og russiskur uttanríkisráðharri, tosaðu í gjár saman í telefon, skrivar Reuters. Tað gjørdu teir, eftir at forsetarnir báðir tosaðu saman í seinastu viku.

Trump hitti ukrainska Volodymyr Zelenskyj í Hvítu Húsunum fríggjadagin.

Donald Trump hevur leingi havt sum mál at fáa frið í lag millum partarnar, og ofta hevur ivi verið um altjóða, hvørjum parti, hann heldur við.