Ja takk til fleiri føroyskar barnafilmar

- Vit kundu uttan trupulleikar víst fýra barnafilmar við føroyskari talu um árið, tí fólk ynskja at sleppa í biograf við børnunum til føroyskar filmar, sigur Mourits Clementsen, stjóri í Havnar Bio, sum í løtuni fyrireikar frumsýningina av Palla Halaleysa saman við Kringvarpinum.

Filmurin um Klintrimús var tann fyrsti, sum kom burtur úr samstarvinum millum Kringvarpið og Havnar Bio, og fleiri enn 8.000 atgongumerki vóru seld til filmin, ta tíðina hann gekk í biografinum. Sìðan tá hevur hann bæði verið sýndur aðrastaðni í landinum og í sjónvarpinum, og liggur nú í VIT appini.

At tað júst gjørdist Palli Halaleysi hesa ferð, kemst av, at hesin filmurin er sera fittur, umframt at rættindini til at vísa filmin vóru til at hava við at gera, sigur Páll Danielsen, sum hevur tikið sær av verkætlanini í Kringvarpinum. Eisini hann kundi hugsað sær, at fleiri filmar vóru á føroyskum máli.

- Tað, at børnini skilja tað, sum figurarnir í filminum siga, ger upplivingina so nógv betri, tí tá sleppa foreldur undan at sita og teska teimum tað, sum verður sagt, heldur Mourits.

Palli Halaleysi verður frumsýndur í morgin hósdagin og verður annars vístur fleiri ferðir um dagin í heystfrítíðini.