30 prosent av kortnýtsluni er í útlandinum

Í gjár legði Búskaparráðið heystfrágreiðing sína fram. M.a. viðger Búskaparráðið nýtslu av føroyskum gjaldskortum. Og hóast, at tølini sveiggja eitt sindur yvir tíð, so er ikki til at fara skeivur av, at føroyingar brúka rættiliga fitt av pengum uttanfyri landoddarnar.

Gjaldskortsnýtsla - Búskaparráðið

Fyrra hálvár 2023 var 28 prosent av kortnýtsluni uttanlands, fyrra hálvár 2024 30 prosent, og fyrra hálvár 2025 32 prosent. Í 2024 sæst eitt fall í juni, sum Búskaparráðið heldur stavar frá stóra verkfallinum, ið merkti føroyska samfgelagið tá, tí at vørur vantaðu í føroyskum handlum.

Tølini sveiggja nógv, og Búskaparráðið heldur, at útlendski parturin av kortnýtsluni er hækkandi. Yvirskipað kunnu vit siga, at okkurt um 30 prosent av nýtsluni av føroyskum gjaldskortum er uttanfyri Føroyar.

Ein partur av nýtsluni er í samband við ferðing uttanlands, sigur Búskaparráðið. Men tað fevnir eisini um hald av stroymingtænastum, spølum á netinumm og vørukeup á útlendskum heimasíðum. Tað vørukeypið kann verið bæði lítið og stórt, sum t.d. møblar ella køkar.

Tølini hevur Búskaparráðið fingið frá Føroya Banka og Betri Banka.