Læra um perluseyming á grønlendska tjóðardegnum

Grønlendskur tjóðardagur er í dag, og í Norðurlandahúsinum sluppu føroyingar at hátíðarhalda dagin við at læra seg grønlendska perluseyming.

- Eg sá uppslagið á Facebook og helt, at tað sá áhugavert út. Tað sigur Sanna Vang.

Læra at seyma grønlendskan perlukraga

Hóast Sanna Vang ikki hevur røtur í Grønlandi, hevur hon sum fleiri onnur, leitað sær vegin í Norðurlandahúsið fyrrapartin at læra um perluseyming.

Pipaluk Joensen er úr Nuuk í Grønlandi og hevur búð í Føroyum í seks ár. Hon lærdi at seyma grønlendskan perlukraga, tá hon var heilt ung, og í dag er tað hon, ið stendur fyri verkstovuni.

Tjóðardagurin er ein veitsludagur

Fyri hana er perluseymingin ein partur av at hátíðarhalda tjóðardegin - og sambært henni er tað vanligt at gera nógv burturúr, tá álmanakkin sigur 21. juni. 

Tað er ikki líka allastaðni í Grønlandi, men tónleikur og góður matur er aloftast ein partur av degnum. 

Soleiðis verður eisini í dag hjá Pipaluk Joensen, tí tá verkstovan er liðug, fer hon beina leið í grønlendska húsið, og tá verður kópakjøt á matskránni.