Lánini tað sama sum BTÚ

Føroyingar læna ikki bara pengar í føroyskum peningastovnum.

Váðaráðið skrivar, at føroyingar hava lænt 600 milliónir krónur í svenskum bankum, 2,7 milliardir í norskum bankum og eina milliard í íslendskum bankum.

Útlán frá føroyskum, donskum, norskum, svenskum og íslendskum bankum til føroyingar vóru 28 mia. kr. við árslok 2024.

Hetta svarar til 100 prosent av BTÚ, bruttotjóðarúrtøkuni, í 2024, skrivar Váðaráðið.

Váðaráðið veit eisini at siga, at útlánsvøksturin hjá føroysku peningastovnunum var 3,3 prosent í januar í ár.

Kommunur og húsarhald læna. Har er vøksturin ávikavist 8,4 prosent og 6,3 prosent.

Men útlánsvøksturin til almenn feløg er minkaður, og útlánsvøksturin til privatu vinnuna er framvegis negativur.

Vøksturin í innlánum frá privatu vinnuni er nógv øktur.

Hann var 16,6 prosent í januar.

Innlánsvøksturin hjá húsarhaldunum var 5,7 prosent í januar 2025.

Allir peningastovnarnir í Føroyum hava størri innlán enn útlán.