Føroyar fingu Montenegro, Ísland og Portugal

Føroysku hondbóltskvinnurnar skulu spæla ímóti Montenegro, Íslandi og Portugal í royndini at koma til EM-endaspælið í 2026

Súna Krossteig Hansen og hinar hondbóltskvinnurnar skulu spæla ímóti Portugal, Íslandi og Montenegro í undankappingini til EM-endaspælið

Mynd: Liselotte Sabroe/Ritzau Scanpix

Símun Christian Olsen

20.03.2025 - 16:18

Føroysku hondbóltskvinnurnar skulu spæla ímóti Portugal, Íslandi og Montenegro í undankappingini til EM-endaspælið, sum verður í Póllandi, Rumenia, Kekkia, Slovakia og Turkalandi í desember 2026.

Føroyar vóru í fjórða av fýra styrkisbólkum, sum vóru gjørdir út frá úrslitunum seinastu fýra árini.

Tey fimm vertslondini fara beinleiðis í endaspælið saman við Norra, Danmark og Ungarn, sum vunnu ávíkavist gull, silvur og bronsu til EM í fjør.

Tey 24 liðini í undankappingini spæla sum vanligt úti og heima ímóti teimum trimum mótstøðuliðunum í sínum bólki.

Tveir teir fyrstu dystirnir vera 15. - 19. oktober 2025, 3. og 4. umfar verður 4. - 8. mars 2026 og tveir teir síðstu dystirnir vera 8. - 12. apríl 2026.

Tvey tey bestu liðini í hvørjum bólki og fýra teir bestu trý'ararnir spæla seg til endaspælið.