Nýggi kanslarin væntar harðar samgongutingingar

Komandi samveldiskanslarin í Týsklandi, Friedrich Merz, sigur, at samgongusamráðingarnar við sosialdemokratiska flokkin, SPD, verða harðar.

- Í fyrstu atløgu mugu vit tosa um nýskipanir og møguligar skerjingar á fíggarlógini, segði Merz við týska kringvarpið, ARD, í gjár.

Hann er leiðari fyri kristin-konservativu samgonguni CDU og CSU, sum vann valið í februar.

Samgongan er í samráðingum við flokkin hjá fráfarandi forsætisráðharranum, Olaf Scholz, SPD.

Avtala fyri 3.730 milliardir

Flokkarnir hava gjørt avtalu um ein slóðbrótandi fíggjarpakka fyri undirstøðukervið og verjuna. Hann kemur til viðgerar í samveldistinginum í morgin.

Fíggjarpakkin kostar 500 milliardir evrur, sum eru 3.730 milliardir krónur.

Nógvar atfinningar hava verið móti pakkanum, ikki bara av tí, at hann er so stórur, men eisini tí ætlanin er at slaka í grundalógarbundna markinum um almenna skuld. 

Skal pakkin verða samtyktur í samveldistinginum, krevst avgjørdur meiriluti. Tað er, at  tveir triðingar av samveldistinginum atkvøða fyri uppskotinum.