Gera arbeiðið liðugt á Klaksvíkar sleipistøð

Línuskipið Polarstjørnan stendur framvegis á bedingini hjá Klaksvíkar sleipistøð. 

Tað var 19. desember, at Polarstjørnan koppaði av bedingsvogninum, tá ið hon skuldi av bedingini. Skipið var komið umleið hálva leið úr sjónum, tá óhappið hendi, men stutt eftir kundu kavarar staðfesta, at skipið ikki hevði fingið skaða.

Men í síðsta mánaði eydnaðist við serkønari hjálp úr Danmark at fáa skipið á beint aftur. 

Gera alt arbeiðið í Klaksvík

Ætlanin var tá, at Polarstjørnan skuldi sigla til Havnar, har hon skuldi upp á beding hjá MEST.

Línuskipið stendur tó framvegis á bedingini hjá Klaksvíkar sleipistøð, tí alt arbeiðið verður nú gjørt har, sigur Frimodt Rasmussen, stjóri á Klaksvíkar sleipistøð.

Hann dugir ikki at siga, nær Polarstjørnan fer á sjógv aftur.

Polarstjørnan, sum er bygd í Noregi í 1971, er 417 bruttotons. Skipið er góðar 37 metrar langt.