Christian situr tryggur

Á aðalfundinum hjá Fótbóltssambandinum, sum er á Hotel Hilton í Havn, gjørdist tað ikki so spennandi kortini, tá ið tvey valevni hesaferð vóru uppstillað til forsetasessin.

Avbjóðarin John Eystberg fekk bara tríggjar atkvøður, meðan sitandi forseti, Christian Andreasen, við 29 atkvøðum fekk dygga undirtøku, so hann eisini situr næstu fýra árini.

Christian Andreasen hevur verið forseti í FSF síðani í 2010, tá hann vann á Høgna í Stórustovu, sum aftur varð uppstillaður í 2017. Men MB, sum hevði stillað hann upp, tók uppstillingina aftur áðrenn aðalfundin.

Tá ið Christian Andreasen í 2010 gjørdist forseti, var hann ikki nakað óskrivað blað, tí hann hevði sitið í nevndini hjá Fótbóltssambandinum frá 1986 til 1988 og so aftur frá 2002 til 2004.

Fríðin fall

Val var eisini til starvsnevndina, har tað longu var greitt frammanundan, at Sólrun Hendriksdóttir Sørensen fór at koma í nevndina, tí sambært viðtøkunum hjá FSF skulu bæði kyn veljast í nevndina, og eftirsum eingin onnur kvinna stillaði upp, kom Sólrun Hendriksdóttir Sørensen í nevndina uttan atkvøðugreiðslu.

Størri spenningurin var um hinar báðar nevndarsessirnar, sum stóðu upp á spæl. Umframt verandi nevndarlimirnar Róin Schrøter og Fríðin Ziskason stillaði Jóannes Prestá eisini upp, og tað bleiv ein sera javnur dystur millum teir tríggjar. Tá avtornaði, hevði Jóannes Prestá fingið 21 atkvøður, Róin Schrøter 19 atkvøður og Fríðin Ziskason 17 atkvøður. Sostatt avloysir Jóannes Prestá nú Fríðin Ziskason í nevndini.

Øll feløgini á aðalfundinum høvdu tvær atkvøður í part, tí tey hava øll lið bæði í vaksnu- og ungdómsdeildunum.