Fregnartænasta: Russland fyrireikar seg til stórkríggj í Evropa

Um steðgur kemur í kríggið í Ukraina, ella kríggið heldur uppat, og um NATO ikki samstundis dubbar, kann Russland innan fimm ár vera til reiðar at fara í stórkríggj í Evropa.

Tað skrivar fregnartænastan hjá donsku verjuni, stytt FE, í nýggjari meting av hóttanini úr Russlandi.

Sambært FE, verður hernaðarliga hóttanin úr Russlandi størri næstu árini.

FE sigur, at Russland um einar seks mánaðir kann fara í lokalt kríggj í einum grannalandi.

Russland kann um umleið tvey ár verða ein hóttan móti einum ella fleiri Nato-londum, og sostatt vera til reiðar til kríggj móti fleiri londum við Eystrasalt.

Og um eini fimm ár kann Russland vera til reiðar til stórkríggj á evropiska meginlandinum, har USA ikki leggur uppí. 

Treytin fyri tíðarfreistunum er, at NATO ikki samstundis herdubbar við somu ferð sum Russland, skrivar FE.

Eingin hóttan móti Danmark í løtuni

Í metingini stendur eisini, at í løtuni er eingin hóttan um veruligt hernaðarligt álop á Danmark.

Partur av grundgevingini hjá FE er, at Russland samstundis sum kríggj er í Ukraina er farið at nýskipa herdeildirnar í landinum.

Men seinasta árið er tað arbeiðið farið frá fyrst og fremst at snúgva seg um umbygging, til at vera ein miðvís hernaðarlig uppbygging við tí endamáli at kunna fara í kríggj móti NATO, stendur í hóttanarmetingini.

- Russland hevur longu megnað at dagført sínar førleikar til bæði at nútímansgera herútgerðina, og hevur eisini set munandi størri ferð á hernaðarligu framleiðsluna hjá sær. 

Russland kann longu í dag marka útgerð til herdubbing móti NATO, serliga orsakað av fíggjarliga og materiella stuðlinum, sum landið fær uttanífrá, stendur í frágreiðingini.

Øðrvísi hóttan móti Føroyum og Grønlandi

Sambært fregnartænastuni hjá donsku verjuni er hóttanin um veruligt hernaðligt álop á Grønland og Føroyar øðrvísi, enn hóttanin móti Danmark.

Orsøkin er, at Russland sær londini bæði í einum norðuramerikanskum samanhangi, skrivar FE.

- Hetta merkir, at Russland ikki neyðturviliga fer at blanda Grønland og Føroyar upp í eitt evropeiskt stríð, og at strategiski áhugin hjá landinum fyri økinum er meira knýttur at sambandinum við USA enn Evropa, skrivar fregnartænastan í metingini.