Filmsmenn: "David Lynch megnaði at flyta listafilmar yvir í meginstreymin"

"This is a damn fine cup of coffee."

Hvørt mansbarn, ið vaks upp í áttati og kom til aldur í níti árunum, kennir kenda orðafellið hjá fregnartænastumanninum Cooper úr sjónvarpsrøðini Twin Peaks frá 1990. 

Maðurin, ið skapti Twin Peaks, David Lynch, er deyður, 78 ára gamal. 

Hetta boðaði familjan hjá Lynch frá á Facebook í gjár. 

Luftuppsvølpan í kroppinum

David Lynch gjørdi alt fyri eitt vart við seg innan filmsheimin við sínum fyrsta filmi, "Eraserhead", frá 1979, og síðani "Elephant Man" og "Dune" frá 1984. 

Síðani hevur hann gjørt kendar filmar sum "Blue Velvet" frá 1986, "Wild at Heart" frá 1990 og "Mulholland Drive" frá 2001.

Men tað er serliga Twin Peaks, ið er stóri varðin, sum stendur eftir David Lynch. 

Umframt film og sjónvarpsrøðir, so gjørdi David Lynch eisini tónleik, hann skrivaði bókmentir og skapti myndlist. 

Í 2019 varð David Lynch fagnaður við einum heiðurs-Oscar fyri sítt virkið filmslistini at frama. 

Í fjør kunngjørdi David Lynch, at hann hevði fingið staðfest luftuppsvølpan í kroppinum, ið nevnist emphysema á enskum. 

Broytti formin á sjónvarpsrøðum

Filmsmenninir Gudmund Helmsdal og Hermann Eliassen, sum saman hava films-poddvarpið Hermann & Helmsdal á Youtube, vóru í Góðan morgun Føroyar, har teir settu nøkur orð á týdningin, ið David Lynch hevur havt bæði fyri teir, men eisini fyri filmslistina og -ídnaðin. 

Hermann & Helmsdal, Hermann Eliassen, Gudmund Helmsdal

Teir vóru á einum máli um, at David Lynch við Twin Peaks var upphavið til teirra áhuga fyri filmi.  

"David Lynch flutti listafilmar, art movies, sum oftan bara vóru í umferð millum filmsnørdar, yvir í meginstreymin," staðfestir Hermann Eliassen. 

"Við Twin Peaks, so broytti David Lynch eisini ímynd av, hvat ein sjónvarpsrøð er, tí heldur enn at vera ein samling av sjálvstøðugum pørtum, so var hon ein lang, samanhangandi søga. Twin Peaks gjørdist fordømi fyri nógvar av teimum sjónvarpsrøðunum, vit síggja í dag," útgreinar Gudmund Helmsdal. 

Twin Peaks, Gudmund Helmsdal, David Lynch

Í 2007 var Gudmund Helmsdal saman við vinmonnum á roadtrip gjøgnum USA, har vitjað var á støðunum, sum Twin Peaks varð upptikin (Privat mynd á Facebook)