Vatnturbinan á Strond aftur í ólagi

Vatnturbinan á Strond, sum bleiv sett í gongd aftur fyri einari viku síðani eftir høvuðsumvæling, er nú, av ókendum orsøkum, aftur í ólagi, sigur SEV.  

Undir royndarkoyringini hendi ein maskinskaði, sum neyðugt er at kanna nærri. 

Turbinan verður send til Andritz Jevnaker í Noregi til kanningar og umvælingar.

Tí verður eingin streymur gjørdur úr vatni á Strond tað, sum eftir er av árinum.

Turbinan hevði bara gingið í hálvtannað samdøgur, tá skaðin hendi, sigur Heri Mortensen, deildarstjóri fyri framleiðsluna hjá Sev. 

Hann sigur, at enn ber ikki til at siga, hvussu leingi kanningar- og umvælingararbeiðið varar. 

Nógv vatn er í byrgingini í Strandardali, og nú SEV einki vatn brúkar, rennur vatn úr byrgingini.