Sildakvotan á veg

Landsstýrismaðurin í fiskivinnumálum hevur gjørt uppskot um, hvussu nógva norðhavssild, føroyingar kunnu fiska í ár.

Mikudagin fer hann at ráðføra seg við uttanlandsnevndina um norðhavssildakvotuna.

Sambært kunngerð, sum kom beint fyri jól í fjør, er kvotan í ár fyribils 40.000 tons.

Skip undir føroyskum flaggi kunnu fiska 28.015 tons.

Stovnurin av norðhavssild hevur ikki verið so lítil síðani 1988. 

Tað sæst aftur í tilmælinum hjá ICES um heildarkvotuna í ár. 

Tilmæli um minni kvotu

ICES mælir til, at kvotan minkar 24 prosent niður í 390.000 tons.

Seta Føroyar sær aftur í ár eina kvotu, sum er 22 prosent av heildarkvotuni, verður føroyska kvotan sløk 86.000 tons, sum eru 26.700 tons minni enn í fjør.

Fiskifrøðingarnir halda, at tvær orsøkir eru til, at sildastovnurin er í stórari minking. 

Tilgongdin til stovnin hevur ikki verið góð síðani 2016.

Og strandarlondini hava ásett sær nógv størri kvotur, upp í 40 prosent størri, enn ICES mælir til. 

Síðani 2013 hevur eingin avtala verið millum strandarlondini um, hvussu norðhavssildin skal býtast millum londini.