Teldusníkaálop saboterar samrøðu hjá Elon Musk við Trump

Tekniskir trupulleikar settu í gjárkvøldið fót fyri eina beinleiðis stroymda samrøðu, sum eigarin av sosiala miðlinum X, Elon Musk, skuldi hava við republikanska forsetavalevnið, Donald Trump.

Sambært Reuters, so boðaðu fleiri brúkarar frá, at teir ikki kundu fáa atgongd til sendingina.

Musk skrivar í einum uppslagi á sosiala miðlinum, at tað er líkt til, at miðlarnir eru raktir av einum "umfatandi DDOS-álopi".

Eitt DDOS álop merkir, at eitt stórt tal av teldum royna at seta seg í samband við ein servara, fyri at ovtyngja kapasitetin á servaranum og harvið fyribils seta hann úr nýtslu.

Beinleiðis sendingin á X skuldi verið liðug klokkan eitt í nátt føroyska tíð.

Men á profilinum hjá Musk, har tú skuldi kunna trýsta á eitt uppslag fyri at fylgja sendingini, men í staðin fyri var bara eitt stórt tómt ljósareytt felt.

Í yvir 20 minuttir var einki at hoyra frá Elon Musk, áðrenn hann boðaði frá, at X eftir øllum at døma var undir álopi frá teldusníkum.

Stutt fyri klokkan 01:30 mátti hann ásanna, at sendingin ikki gekk sum ætlað, men at sendingin helt fram við teimum brúkarum, sum høvdu fingið atgongd til samrøðuna

- Vit fara at halda fram við teimum fáu lurtarum, sum longu lurta, klokkan 20.30 (01.30 týsdag føroyska tíð, red.), og so leggja vit eina óredigeraða útgávu av upptøkuni út beint aftaná, skrivar Elon Musk.

Hann leggur eisini dent á, at umfatandi royndir longu eru gjørdar at fáa skipanina í rættlag aftur.

- Vit royndu skipanina við átta milliónum lurtarum í senn fyrr í dag, skrivar Musk.

Donald Trump er republikanska valevnið til amerikanska forsetavalið í november.

Elon Musk, sum eisini eigur rúmdarfarafyritøkuna SpaceX og elbilaframleiðslufyritøkuna Tesla, hevur fleiri ferðir víst sín stuðul til Trump.

/ritzau/