Evropa League: Lukkaðist KÍ at vinna tepurt

KÍ vann við tveimum málum ímóti einum á Borac Banja Luka í heimadystinum í 3. umfari í Evropa League, og bæði spælarar og viðhaldsfólk kundu fara væl nøgd av Tórsvølli og norð á Summarfestivalin, sum byrjaði í kvøld.

Páll Klettskarð og Kristoffer Ødemarksbakken skutu málini hjá KÍ í sigrinum, sum kanska kundi verið størri, tí klaksvíkingar spældu stóran part av dystinum við 10 ímóti 11, eftir at útiliðið fekk reytt kort, tá hálvur tími var spældur.

Páll skoraði aftur í Evropa

Eftir tey bæði málini ímóti Malmø í Champions League segði Árni Frederiksberg, at nú KÍ ikki longur var við í fínastu evropeisku kappingini, var hann liðugur at skjóta mál, og aðrir máttu taka yvir.

Vongurin hugsaði kanska serliga um Páll Klettskarð, sum hevur góð hagtøl í Evropa, og framherjin tók áheitanina til sín. Eftir fleiri góðar kjansir fyrstu løtuna las hann eina afturlegging og setti bóltin í netið úr stuttari frástøðu.

KÍ var greitt við yvirlutan, men Borac javnaði kortini eftir eitt margháttligt sjálvmál í 31. minutti. Bert tveir minuttir seinni var Sebastián Herera vístur av vølli eftir seina og ljóta takkling, sum rakti Jóannes Kalsø Danielsen inn á leggin, og KÍ gjørdi sær dælt av frísparkinum. 

Árni Ferderiksberg legði ein flatan bólt inn í brotsteigin, har Kristoffer Ødemarksbakken hegnisliga legði bóltin ímillum beinini á verjuleikara og inn við handaru stongini. 

Fingu ikki gjørt sær dælt at støðuni

Nú sá veruliga gott út hjá KÍ, sum nú hevði ein tíma at økja um leiðsluna á meir enn hálvtóma Tórsvølli. Tað eydnaðist kortini ikki, hóast KÍ hevði bóltin nógv.

Teir bláu megnaðu ikki at spæla seg til stórvegis møguleikar framman fyri Borac-málverjanum, Damjan Siskovski, sum hevði úr at gera við ferð eftir ferð at lata sum um, hann hevði fingið skaða, og so endaði dysturin 2-1.

Eitt fínt úrslit, eitt gott útgangsstøði, men um tað verður nóg mikið um eina viku, fer tíðin at vísa.

Tórsvøllur (Evropa League, 3. umfar)

KÍ - Borac Banja Luka, 2-1 (2-1)
1-0 Páll Klettskarð, 10 min.
1-1 Sjálvmál, 31 min.
2-1 Kristoffer Ødemarksbakken, 33 min.